Қазалы көлік-техникалық жоғары колледжі кітапханасында «Атаулы күндер» аясында Қазақстанда тарих ғылымының қалыптасуы мен дамуына өлшеусіз үлес қосқан, қазақ тарихнамасының көрнекті қайраткері Ермұхан Бекмахановтың туылғанына 110 жыл толуына орай «Ауыздықталмаған тарихшы» тақырыбында тарихи-деректі сағат өткізілді. Шараның мақсаты-жастарымыздың ұлттық тарихымызға деген қызығушылығын арттыру, Е.Бекмахановтың өмірі мен шығармашылығын талқылап, оның қазақ тарихындағы маңызды рөлі туралы насихаттау. Шара барысында ғалымның өнегелі өмірін баяндайтын «Аманат» фильмінен үзінділер көрсетіліп, М.Сәрсекенің «Ноқталанған тарихшы» кітабына библиографиялық шолу жасады.

«Жарық дүниеге келген әрбір пенде өз қалауынша өмір сүруге ерікті. Ермұхан Бекмаханов та мейірімді Алла пешенесіне жазған дарын-қабілеті арқасында өз қатарынан қара үзіп шығып, Қазақ Елі тарихының қатпарлы сырларын тереңдете қазып, туған халқына елеулі еңбектер беруге құлшынған білімпаз еді. Амал қанша, батыл ойға тұсау, еркін көңілге кісен салған қатыгез заман оның ең алғашқы қарымды еңбегіне тыйым салып, қазақ тарихнамасының төрі түгілі босағасынан да орын бермей, үнемі қуғын көріп, нағыз дер шағында өмірден озды. «Ноқталанған тарихшы» ғұмырнамасында деректі жанрдың шебері М.Сәрсеке шерменде тарихшының өмірін әсірелеусіз баяндап, оның жолын кескен қаскүнем замандастарының есімдері де, қастандық әрекеттері де ҰҚК-нің жабық мұрағатынан алған деректермен нақты сипаттайды. Кешегі кер заманның қитұрқы зауалын бүкпесіз ашып, билік басындағылардың сорақы қиянаттарын әшкерелейтін деректі туынды бүгінгі оқырманды бей-жай қалдырмайды деген үміттеміз»,-колледж кітапханашысы С.Сугурова тарихқа шегініс жасады.