Қазалы көлік-техникалық жоғары колледжі кітапханашысы С.Сугурова кенттік кітапханамен бірлесе отырып «Балалар кітапханасы», «Оқуға құштар колледж» тұжырымдамасы аясында қазақтың ақын қызы, халық жазушысы, журналист, мемлекет және қоғам қайраткері Фариза Оңғарсынованың 85 жылдығына орай  «Жыр падишасы-Фариза» атты әдеби  кеш өткізілді. Шараның мақсаты-ақынның өмірі мен шығармашылығымен таныстыру, ақын поэзиясын насихаттау, жырлары арқылы жастардың отансүйгіштік рухын ояту, туған елімізді, жерімізді сүюге, құрметтеуге тәрбиелеу.

Ф.Оңғарсынова-қазақ поэзиясының жарық жұлдызы, халықтың сүйікті ақыны, аудармашы, қоғам қайраткері. Оның шығармашылығы қазақ әдебиетінің алтын қорына қосылған баға жетпес мұра, поэзиясымен халықтың жүрегіне жол тауып, сөздің құдіретін терең сезініп, халықтың ой-арманын, жан дүниесін бейнелегені үшін өз заманының ұлы тұлғасына айналған тұлға. Жыр кешінде ақынның өмір жолы мен шығармашылығына негізделген бейнеролик көрсетіліп, сахналық көрініс қойылды. Тағылымды шарада кенттік кітапхана меңгерушісі Э.Жолтаева «Фариза поэзия әлемінде»  тақырыбындағы кітап көрмесін таныстырса, колледж студенттері Фариза апамыздың өлеңдерін нақышына келтіре жатқа оқыды. Іс-шара барысында ақынға арналған замандастарының пікірлері мен бағаларын СОБ-22/9 тобының студенттері Пазылбек Гүлсезім мен Жалғасбекова Ақбота оқыды. Кеш соңында осы белсенді студенттер Алғыс хатпен марапатталды.